बर्दिया । जिल्ला प्रहरी कार्यालय बर्दियाका प्रमुख प्रहरी उपरीक्षक (एसपी) सरोज पौडेलले लागुऔषध सेवन र ओसारपसार नियन्त्रणका लागि समुदायस्तरमै सचेतना आवश्यक रहेको बताउनु भएकाे छ ।बर्दियाका सञ्चारकर्मीहरूसँग भएको भेटघाट तथा अन्तरक्रिया कार्यक्रममा बोल्दै उक्त कुरा बताउनु भएकाे हाे ।
उहाँले बर्दिया मात्र नभई नेपालभर लागुऔषध कारोबार बढ्दो क्रममा रहेको भन्दै यसको रोकथामका लागि प्रहरी मात्र पर्याप्त नहुने स्पष्ट पार्नु भयाे । खुला सिमानासँग जोडिएको बर्दियालाई संवेदनशील क्षेत्रका रूपमा लिइएको उल्लेख गर्दै उहाँले सञ्चारकर्मी, स्थानीय समुदाय र प्रहरी सबै मिलेर सचेतनात्मक अभियान सञ्चालन गर्नुपर्नेमा जोड दिनु भयाे ।
उहाँका अनुसार बर्दियाका विभिन्न नाकाबाट दैनिक रूपमा लागुऔषध प्रयोगकर्ता र घटनामा संलग्न व्यक्तिहरू पक्राउ परिरहेका छन् । सम्भावित आपराधिक घटनालाई रोकथाम गर्न प्रहरी आफूसँग उपलब्ध स्रोतसाधनको अधिकतम प्रयोग गर्दै तत्काल घटनास्थलमा पुग्ने प्रतिबद्धता पनि उहाँले जनाउनु भयाे ।
एसपी पौडेलले प्रहरी पनि एक नागरिक भएकाले स्वास्थ्य समस्या वा अन्य असुविधा नभएसम्म सुरक्षाका लागि निरन्तर खटिने बताउनु भयाे । साथै पछिल्लो समयमा देशभर अनलाइन ठगी बढ्दै गएकोप्रति चिन्ता व्यक्त गर्दै उहाँले ठूलो गिरोहले सामाजिक सञ्जालमार्फत सामान्य नागरिकलाई आर्थिक प्रलोभनमा पारी ठगी गर्ने घटना बढेकाले यस विषयमा सञ्चारकर्मीमार्फत व्यापक सचेतना फैलाउन आग्रह गर्नु भयाे।
ठगी घटनाबारे सचेत वर्गले ख्यालपूर्वक निगरानी गरी आवश्यक सूचना दिनुपर्नेमा उहाँले जोड दिनु भएकाे छ ।
