होमेन्द्र थापा, बर्दिया
जबरजस्ती करणी मुद्दामा सजाय तोकिएपछि फरार रहेका एक प्रतिवादीलाई जिल्ला प्रशासन कार्यालय बर्दिया र प्रहरीको सहयोगमा पक्राउ गरिएको छ। पक्राउ पर्नेमा साविक मैनापोखर–७, हाल बढैयाताल गाउँपालिका–७ निवासी २९ वर्षीय कृष्ण चमार रहेका छन्।
जिल्ला प्रशासन कार्यालय बर्दियाका अनुसार चमार नयाँ नागरिकता लिन कार्यालयमा आएका बेला प्राप्त गोप्य सूचनाका आधारमा पक्राउ परेका हुन्।
पक्राउ परेका चमारलाई जिल्ला प्रहरी कार्यालयमार्फत जिल्ला अदालतमा पेस गरिएको थियो। अदालतको आदेशअनुसार उनलाई आजै बर्दिया कारागार चलान गरिएको जिल्ला प्रशासन कार्यालय बर्दियाका प्रशासकीय अधिकृत लोकप्रसाद ढकालले जानकारी दिनुभयो।
ढकालका अनुसार जबरजस्ती करणी मुद्दामा बर्दिया जिल्ला अदालतले २०७२ फागुन १० गते चमारलाई १० वर्ष कैद सजाय सुनाएको थियो। त्यसपछि उच्च अदालत तुलसीपुर, नेपालगञ्ज इजलासले २०७३ फागुन ८ गते पाँच वर्ष कैद सजाय हुने फैसला गरेको थियो। सर्वोच्च अदालतले २०७९ साउन २९ गते जिल्ला अदालतको फैसलालाई सदर गरेको थियो।
यसैबीच, पछिल्लो समय बर्दियामा फरार प्रतिवादी पक्राउ पर्ने क्रम बढेको छ। चालु आर्थिक वर्षको साउन महिनामा मात्रै अदालतबाट सजाय तोकिएका १९ जना फरार प्रतिवादीलाई पक्राउ गरी अदालतसमक्ष उपस्थित गराइएको जिल्ला प्रहरी कार्यालयले जनाएको छ।
