बर्दिया, असार ११ – बारबर्दिया नगरपालिकामा हालसालै नियुक्त गरिएका महिला सामुदायिक स्वास्थ्य स्वयमसेविकाहरूका लागि आजदेखि १० दिने आधारभूत तालिम सुरु भएको छ।
यो तालिम उमेरहद वा स्वेच्छिक अवकाश लिएका स्वयमसेविकाहरूको स्थानमा नियुक्त नयाँ स्वयमसेविकाहरूलाई लक्षित गरी सञ्चालन गरिएको हो। तालिमको उद्घाटन कार्यक्रममा नगरप्रमुख छबिलाल थारुले महिला स्वयमसेविका स्थानीय सरकार र समुदायबीचको सेतु भएको उल्लेख गर्दै, स्वास्थ्य क्षेत्रमा उनीहरूको भूमिका अत्यन्त महत्वपूर्ण रहेको बताउनुभयो। उहाँले सेवा सुविधा र उत्कृष्ट कार्यका लागि पुरस्कारको व्यवस्थाबारे जानकारी दिँदै इच्छाशक्ति सहित कार्य गर्न आग्रह गर्नुभयो।
नगरउपप्रमुख रत्नकुमारी पाण्डेले तालिमलाई अन्तरक्रियात्मक बनाउने र सेवा दिनुअघि सेवाको बारेमा बुझ्न स्वयमसेविकाहरूलाई प्रेरित गर्नुभयो।
प्रमुख प्रशासकीय अधिकृत टीकानाथ गोसाईले स्वयमसेविकाले मन, बचन र कर्मबाट सेवा दिनुपर्ने भन्दै उनीहरू राज्यको प्रतिनिधिको रूपमा सूचना प्रवाह गर्ने भएकाले आधिकारिक र सटीक हुनुपर्नेमा जोड दिनुभयो।
स्वास्थ्य शाखा प्रमुख गोबिन्द पौडेलले सेवा सुविधा भन्दा ज्ञान र सीपमा ध्यान दिनुपर्ने सल्लाह दिँदै तालिम सफल होस् भन्ने शुभकामना व्यक्त गर्नुभयो।
तालिममा १ महिना देखि ५ वर्षसम्म काम गरिसकेका तर आधारभूत तालिम लिन बाँकी रहेका १८ जना स्वयमसेविकाहरू सहभागी छन्।
