लेटाङ । चार दिनदेखि बन्द रहेका लेटाङ नगरपालिकामा रहेका नीजि स्वास्थ्य सँस्थाहरु भोलि सोमवारदेखि खुल्ने भएका छन् । लेटाङ नगरपालिकासँग आज आइतबार भएको छलफलका क्रममा सञ्चालकहरुले बन्द गरिएका स्वास्थ्य सँस्थाहरु खोल्ने प्रतिवद्धता जनाएका हुन् ।
लामो समयसम्म स्वास्थ्य जस्तो संवेदनशिल क्षेत्रमा बन्द हडताल गर्दा जनताको स्वास्थ्य उपचारमै समस्या देखिएको भन्दै नगरपालिकाका जनप्रतिनिधिहरुले खुल्ला गर्न आग्रह गरेपछि सञ्चालकहरु स्वास्थ्यसँस्था खोल्न सहमत भएका हुन् ।
छलफलमा नगर प्रमुख भूपेन्द्र कुमार लावती, नगर उपप्रमुख कृष्ण कुमारी निरौला, प्रमुख प्रशासकिय अधिकृत नारायण न्यौपाने, वडा अध्यक्षहरु तथा नीजि स्वास्थ्य संस्था तथा मेडिकल संचालकहरुको सहभनगिता रहेको थियो ।
लेटाङ ४ स्थित बंगलीको क्लिनिक भनेर चिनिने जनप्रिय मेडीकल हलमा उपचार गराएकी स्थानीय बिनिता तामाङको उपचारको क्रममा निधन भएपछी पीडित पक्ष आन्दोलित हुँदा स्वास्थ्यसंस्था सञ्चालकहरुले असुरक्षा भएको भन्दै सेवा ठप्प पारेका थिए ।
यता पीडित पक्ष भने डाक्टरको लापरवाहीका कारण विनीताको मृत्यु भएको भन्दै दोशीलाई कारवाही नगरेसम्म अन्तिम सँस्कार नगर्ने भन्दै आन्दोलित छन् । विनिताको गत मंगलबार विराटनगरस्थित विराट नर्सिङ होममा उपचारका क्रममा मृत्यु भएको थियो । अघिल्लो दिन सोमबार मात्रै जनप्रिय मेडिकलले अन्यत्र लैजानु भनेर रेफर गरेको थियो ।
यसअघि लेटाङकै दीर्घायू मेडिकलमा पनि यस्तै प्रकृतिको घटना भएको थियो । मेडिकलमा उपचार गराइरहेका लेटाङ ७ का एक बालकको रेफर गरेर विराटनगर पुर्याएको भोलिपल्ट मृत्यु भएपछि स्थानीय र आफन्तले आन्दोलित भएका थिए । लेटाङमा नीजि क्लिनिकहरुमा उपचार गराएकाहरुले पटक पटक ज्यान गुमाउनु परेपछि स्थानीयबासी आक्रोशित भएका छन् ।
