बर्दिया,
नागरिक समाज संस्थाको वार्षिक लेखाजोखा गोष्ठी दुई दिनसम्म ठाकुरबाबा नगरपालिकाको ठाकुरद्धारामा भएको छ ।
प्लान इन्टरनेशनल नेपाल र भेरी वातावरणीय विशिष्टता समूह (बी–ग्रुप) बाँकेले सञ्चालन गरेको बाल विवाह न्यूनीकरण परियोजनाअन्तर्गत आयोजित दुई दिने गोष्ठीमा बारबर्दिया, ठाकुरबाबा, मधुवन नगरपालिका र गेरुवा गाउँपालिकामा रहेका नागरिक समाजका पदाधिकारीहरुको सहभागिता रहेको थियो ।
गोष्ठीमा सहभागीहरुले नागरिक समाजलाई दिगो, क्रियाशील र प्रभावकारी बनाउन पालिका र सहयोगी संस्थाले निरन्तर क्षमता विकासका कार्यक्रम अघि बढाउनुपर्ने सुझाव दिनुभएकाे छ । सचेतनशील नागरिकहरुको समूह भए पनि यसको स्थायित्वका लागि स्थानीय सरकारको अपनत्व, स्वयम्सेवक परिचालन, कार्यालय व्यवस्थापन र योजनाबद्ध ढंगले काम गर्ने चुनौती रहेको सहभागीहरुको भनाइ थियो ।
चुनौतीबीच पनि नागरिक समाजले समुदाय स्तरमा बाल विवाह न्यूनीकरण र हानिकारक अभ्यास न्यूनीकरणमा महत्त्वपूर्ण योगदान दिइसकेको सहभागीहरुले औल्याएका छन् । साथै, स्थानीय सरकारका अभियानमा सहकार्य गर्ने, कमजोरी भए सचेत गराउने कार्यलाई निरन्तरता दिइरहेको उल्लेख गरियो ।
सामाजिक अभियन्ता तथा गोष्ठीका सहजकर्ता शिवलाल पाण्डेले नागरिक समाजको विश्व इतिहास, वर्तमान अवस्था र आवश्यकताबारे जानकारी गराउँदै यसको संरचना र समुदायमा खेल्नुपर्ने भूमिकाबारे प्रष्ट पार्नु भएकाे छ । उहाँले संजाल संस्थाले लेखाजोखा पारदर्शी बनाउन आवश्यक सबै पक्षमा ध्यान दिनुपर्नेमा जोड दिनुभयो ।
गोष्ठीमा बी–ग्रुपका अध्यक्ष इन्द्र बहादुर भण्डारी, परियोजना प्रबन्धक खेम भण्डारी, प्राविधिक संयोजक जयलाल विश्वकर्मा तथा अन्य प्रतिनिधिहरूले सहकार्यलाई निरन्तरता दिने प्रतिवद्धता व्यक्त गर्नु भएकाे छ ।
भदौ १९ र २० गते सम्पन्न गोष्ठीमा चार पालिकाबाट २० जनाको सहभागिता रहेको आयोजकले जनाएको छ ।
