बर्दिया - नेकपा माओवादी केन्द्रका अध्यक्ष पुष्पकमल दाहाल प्रचण्डले जनताले प्राप्त गरेका अधिकार खोस्ने षड्यन्त्र भइरहेको भन्दै त्यसविरुद्ध जनताले एकजुट हुनुपर्ने बताउनु भएको छ ।
“जनतासँग माओवादी, तराई मधेस जागरण अभियान” अन्तर्गत बर्दियाको मधुवन नगरपालिकामा आयोजित जनसभालाई सम्बोधन गर्दै उहाँले संविधानमार्फत महिलासहित दलित, थारु, मधेसी, मुस्लिम र पछाडि पारिएका वर्गले प्राप्त गरेका अधिकारप्रति असहिष्णुता देखाउने तत्वहरूले देशलाई पुनः हत्या, हिंसा र आतंकतर्फ धकेल्न खोजिरहेको बताउनु भएको छ ।
“यो षड्यन्त्र रोक्न नेपाली जनताकै बल आवश्यक छ,” उहाँले भन्नु भयो, “अब जनताको एकताको बलमार्फत मात्र यस्तो दुस्साहसको अन्त्य सम्भव छ ।” प्रचण्डले जनताको एकता र जागरणका लागि माओवादी केन्द्रले योजनाबद्ध रूपमा अभियान अघि बढाएको स्पष्ट पार्नु भएको छ ।
अध्यक्ष प्रचण्डले बर्दियामा विभिन्न कार्यक्रममा सहभागिता जनाउनु भएको छ । बिहान ८ बजे बढैयाताल र बासगढी क्षेत्रका सहिद तथा बेपत्ता परिवारसँग अन्तरक्रिया, त्यसपछि बिहान १० बजे बढैयाताल–६ मैनापोखरमा आयोजित जनसभामा सम्बोधन गर्नु भयो ।
बिहान ११ ः ३० बजे गुलरिया नगरपालिका–१२ बिक्रीगाउँमा निर्मित सहिद कृष्ण चौधरीको शालिक अनावरण गर्नु भयो । त्यसपछि दिउँसो १ः३० बजे मधुवन नगरपालिका लालीबजारमा आयोजित जनसभा तथा ३ः३० बजे ठाकुरबाबा नगरपालिका–१ भुरीगाउँमा नागरिक संवाद कार्यक्रममा सहभागी हुनु भएको छ ।
कार्यक्रममा अध्यक्ष प्रचण्डसँगै वरिष्ठ उपाध्यक्ष नारायणकाजी श्रेष्ठ, उपाध्यक्ष पम्फा भुसाल, अग्नि सापकोटा, महासचिव देव गुरुङलगायत शीर्ष नेताहरूको उपस्थिति रहेको थियो ।
