मोरङ । माध्यमिक शिक्षा परीक्षा (एसईई) को नतिजा शुक्रबारसम्म सार्वजनिक गर्ने राष्ट्रिय परीक्षा बोर्डले तयारी गरेको छ । परीक्षा नियन्त्रक विष्णुनारायण श्रेष्ठले परीक्षाफल प्रकाशनको अन्तिम कामहरु भइरहेकाले असार २२ गते (शुक्रबार) सम्ममा नजिता सार्वजनिक गर्न सक्ने जानकारी दिनुभयो ।
एसईईको नतिजा कुन लेटर ग्रेडिङ अनुसार सार्वजनिक गर्ने भन्ने विषयमा भने अझै निर्णय नभइसकेको परीक्षा नियन्त्रण कार्यालयले जनाएको छ । सरकारले १८ फागुन २०७८ मा संशोधन गरेको लेटर ग्रेडिङ निर्देशिका अनुसार सैद्धान्तिकतर्फ न्यूनतम ३५ र प्रयोगात्मकतर्फ ४० अंक ल्याउनैपर्छ । सैद्धान्तिकतर्फ कुनै विषयमा ३५ भन्दा कम अंक ल्याएमा एनजी (नन ग्रेडेड) लेखिने र कक्षा ११ पढ्न नपाउने र एनजी लेखेको नतिजा भएका विद्यार्थीलाई मूल प्रमाणपत्र नपाउने व्यवस्था छ ।
बोर्डले गत वर्षको एसईईको नतिजा कोभिड–१९ को दोस्रो लहरका कारण पठनपाठन नियमित नभएको र वैकल्पिक सिकाइ प्रणाली पनि प्रभावकारी नभएको भन्दै ‘नन ग्रेडेड’ लागू नगर्ने निर्णय गरेको थियो । जस अनुसार शैक्षिक सत्र २०७८ को एसईईको नतिजा अक्षरांकन (ग्रेडिङ) विधि अनुसार भएको थियो । उक्त विधि अनुसार ‘ई’ ग्रेड पनि निर्धारण गरेर विद्यार्थीलाई प्रमाणपत्र वितरण गरिएको थियो ।
परीक्षा नियन्त्रक विष्णुनारायण श्रेष्ठले नतिजा सार्वजनिक हुनु अघि बोर्डले गरेको निर्णय अनुसार नतिजा सार्वजनिक गरिने बताउनुभयो । गत चैत १७ गतेदेखि २९ गतेसम्म भएको एसईई परीक्षामा देशभरबाट करिब पाँच लाख विद्यार्थी सहभागी भएका थिए ।
