होमेन्द्र थापा, बर्दिया
बर्दिया जिल्लामा बुधवार राति आएको हावाहुरी र बेमौसमी वर्षाका कारण पाक्दै गरेका गहुँ र मकै बालीमा ठूलो क्षति पुगेको छ। यसले स्थानीय कृषकहरुलाई गहिरो चिन्तामा पारेको छ।
बारबर्दिया नगरपालिका र गुलरिया नगरपालिकाका किसानहरूले गहुँ र मकैको बालीमा व्यापक नोक्सानी भएको गुनासो गरेका छन्। बारबर्दिया नगरपालिका निवासी किसान सितारानी थारुले १ विघा मकै र १ विघा गहुँ खेती गर्नुभएको थियो। गहुँ बाली मसिनबाट काट्ने तयारीमा रहँदा हावाहुरी र वर्षाले बाली ढलेपछि अब हातैले काट्नुपर्ने बाध्यता आएको उहाँको भनाइ छ। यसले समय र खर्च दुवै बढाउने चिन्ता उहाँले व्यक्त गर्नुभयो।
त्यस्तै, गुलरिया नगरपालिका वडा नं. ४ का किसान बलु चौधरीले काटेर मुट्ठा पारिएको गहुँ खेतमै दाउन राखिएको अवस्थामा वर्षाले भिजाएको जानकारी दिनुभयो। अब ती गहुँ खोलेर दुई–चार दिन घाममा सुकाएर मात्र थन्काउनु पर्ने झन्झट थपिएको उहाँको भनाइ छ।
हावाहुरी र वर्षाका कारण बाली मात्र नभई कतै रुख ढलेका छन् भने कतै घर तथा टहरामा समेत क्षति पुगेको स्थानीयहरूले बताएका छन्। जिल्ला प्रहरी कार्यालयका अनुसार क्षतिको विवरण संकलनको काम जारी छ।
मौसम अझै पूर्ण रूपमा खुलेको छैन। आगामी दिनमा पुनः हावाहुरी र वर्षा हुन सक्ने सम्भावनाले किसानहरू थप चिन्तित भएका छन्।
बेमौसमी मौसमी परिवर्तनले कृषि क्षेत्रमा गम्भीर असर पारिरहेको अहिलेको अवस्थाबाट स्पष्ट देखिन्छ। किसानहरूले राज्य र सम्बन्धित निकायसँग तत्काल क्षतिको मूल्यांकन गरी राहत तथा सहयोगको माग गरेका छन्।
