लेटाङको जाँते-पथरी सडकखण्डमा हतियार देखाएर दिउँसै लुटपाट

मोरङ । लेटाङ नगरपालिकाको जंगल क्षेत्रमा लुटपाटका घटनामा वृद्धि भएको छ । एकसाता अघि मात्र लेटाङ कानेपोखरी सडकको जंगल क्षेत्रमा लुटपाट भएको घटना सेलाउन नपाउँदै शनिबार लेटाङ ९ जाँतेबाट पथरी जाने सडकखण्डमा दिउँसै लुटपाट भएको छ । जाँते पथरी सडकखण्ड अन्तरगत जंगलको फायरलाइन क्षेत्रमा पथरीबाट जाँतेतर्फ आउँदै गरेका लेटाङ ८ का ओम प्रकाश रानामगर दिउँसो साढे ४ बजेतिर लुटपाटमा परेका हुन् । 

पथरीबाट जाँते फर्कने क्रममा फारलाइन आइपुग्दा हतियार सहित ५ जनाको समुहमा रहेका लुटेराहरुले रानामगरलाई लुटपाट गरेका हुन् । लुटेराहरु ५ जना मध्ये ३ जना लुटपाटमा संलग्न भएको र अन्य २ जनाले आवत जावत निगरानी गरेको पाइएको प्रहरीले जनाएको छ । उनीहरुले रानामगरसँग रहेको नगद ४ हजार तथा ओपो ब्राण्डको मोबाइल लुटेर लगेको अस्थायी प्रहरी चौकी जाँतेका प्रमुख प्रहरी सहायक निरीक्षक राम कुमार कटुवालले जानकारी दिनुभयो । बाईकमा सवार रानामगरलाई लुटेराको समुहले खुकुरी प्रहार गरेपनी हेल्मेटमा लागेकाले चोट भने लाग्न पाएन ।

प्रहरी सहायक निरीक्षक कटुवालले घटनामा संलग्नहरुको खोजीका लागि टोली परिचालन गरिएको जानकारी दिनुभयो । इलाका प्रहरी कार्यालय पथरीको एरियामा घटना भएकाले इलाका प्रहरी कार्यालय पथरीले समेत संलग्नहरुको खोजीका लागि प्रहरी परिचालन गरेको जनाएको छ । प्रहरी नायव उपरीक्षक लक्ष्मी भण्डारीले घटनामा संलग्नको खोजीका लागि टोली परिचालन गरिए पनि हालसम्म थप जानकारी नआएको बताउनुभयो ।   

गतसाता मात्र लेटाङ कानेपोखरी सडकखण्डमा समेत लुटपाट भएको थियो । सोही दिन केराबारीको जंगलमा समेत लुटपाट भएको थियो । लुटपाटका घटनामा लागुऔषध सेवनकर्ताहरु संलग्न भएको हुनसक्ने आशंकामा लेटाङ प्रहरीले पछिल्लो समय लेटाङ क्षेत्रमा विशेष अप्रेसन सञ्चालन गरिरहेको छ ।