मोरङ । एसिया कप क्रिकेटको उपाधि भारतले जितेको छ । आज भएको फाइनलमा श्रीलंकालाई १० विकेटको लज्जास्पद हार चखाउँदै भारत उपाधि विजेता बनेको हो ।
टस जितेर ब्याटिङ रोजेको श्रीलंका ५० रनमै अलआउट भएको थियो । मोहम्मद सिराजले एकै ओभरमा ४ विकेट लिएपछि धराशयी बनेको श्रीलंकाले कुनै पनि क्षण भारतलाई चुनौति दिन सकेन । श्रीलंकाका दुईजना ब्याट्सम्यानले मात्रै दोहोरो अंकमा रन बनाए । चार जना ब्याट्सम्यान शून्यमा आउट भए ।
सिराजले ७ ओभर बलिङ गर्दा २१ रन दिएर ६ विकेट लिए । हार्दिक पाण्ड्याले २.२ ओभरमा ३ रन मात्र खर्चेर तीन विकेट लिए भने जसप्रित बुमराहले १ विकेट लिए । श्रीलंकाका कुशल मेन्डिसले सर्वाधिक १७ रन बनाए ।
जवाफी ब्याटिङमा भारतले ६.१ ओभरमै लक्ष्य भेट्टायो । कप्तान रोहित शर्माको स्थानमा इसान किसनले शुभमन गिलसँग ब्याटिङ सुरुवात गरेका थिए ।
उनीहरुले श्रीलंकाका बलरहरुलाई कुनै मौका दिएनन् । गिलले १९ बलमा ६ चौकासहित २७ रन बनाए भने किसनले १८ बलमा २३ रन बनाए ।
यो संगै भारतले आठौंपटक एसिया कपको उपाधि जितेको छ। पहिलो पटक एसिया कपमा सहभागिता जनाएको नेपालले भारतसंगको खेलमा सम्मानजनक प्रदर्सन गरेको थियो । जसको चौतर्फी प्रसंशा भएको थियो ।
