बारबर्दिया, फागुन ७ — प्रजातन्त्र दिवसको अवसरमा बारबर्दिया नगरपालिका–६, जय नगर बजारमा १८औँ बृहत् रक्तदान कार्यक्रम–२०८२ सम्पन्न भएको छ। “रक्तदान जीवनदान” भन्ने नारासहित आयोजित उक्त कार्यक्रम बिहीबार बिहान १०:०० बजेदेखि सञ्चालन गरिएको थियो।
कार्यक्रमको उद्घाटन बारबर्दिया नगरपालिकाका नगरप्रमुख छबिलाल थारु र प्रमुख प्रशासकीय अधिकृत गौतम भण्डारीले संयुक्त रूपमा रक्तदातालाई रक्तसंकलन सामग्री हस्तान्तरण गर्दै गर्नुभएको थियो। उद्घाटन समारोहमा बोल्दै नगरप्रमुख थारुले रक्तदान मानव जीवन बचाउने महान कार्य भएकाले यस्ता सामाजिक अभियानमा सबैको सक्रिय सहभागिता आवश्यक रहेको बताउनुभयो।
बारबर्दिया नगरपालिका स्वास्थ्य शाखा प्रमुख गोबिन्द पौडेलले कार्यक्रमको उद्देश्य र महत्वबारे जानकारी गराउँदै नगरपालिकामा रक्त सञ्चार केन्द्र स्थापना भएदेखि नै नियमित रूपमा रक्त संकलन कार्यक्रम सञ्चालन हुँदै आएको बताउनुभयो। उहाँले आपत्कालीन अवस्थादेखि नियमित उपचारसम्मका लागि आवश्यक रगत स्थानीय स्तरमै उपलब्ध गराउने लक्ष्यका साथ अभियान अघि बढाइएको स्पष्ट पार्नुभयो।
नेपाल रेडक्रस सोसाइटी बारबर्दिया उपशाखा, नेपाल स्वयंसेवी रक्तदाता समाज बारबर्दिया नगर समिति, सिकल सेल एनिमिया सोसाइटी, इलाका प्रहरी कार्यालय जय नगर लगायतका विभिन्न संघ–संस्थाको सहकार्यमा कार्यक्रम आयोजना गरिएको थियो भने बारबर्दिया नगरपालिका स्वास्थ्य शाखाले समन्वय गरेको थियो।
कार्यक्रममा स्थानीय युवा, कर्मचारी, सुरक्षाकर्मी तथा सर्वसाधारणको उत्साहजनक सहभागिता रहेको आयोजकले जनाएको छ। नियमित रक्तदानले बिरामीलाई समयमै उपचार उपलब्ध गराउन सहयोग पुग्ने विश्वास व्यक्त गरिएको छ।
