बारबर्दिया, — बारबर्दिया नगरपालिकामा लुकेर रहेका क्षयरोगका बिरामी पहिचान गर्ने उद्देश्यले एआई एक्स–रे विधिद्वारा सक्रिय क्षयरोग खोजपड्ताल शिविर सुरु भएको छ। शिविरको उद्घाटन गर्दै नगरप्रमुख छबिलाल थारुले गाउँ–समाजमा लुकेर रहेका क्षयरोगका बिरामी पत्ता लगाउन सबै नागरिकलाई सहयोग गर्न आग्रह गर्नुभयो।
नगरप्रमुख थारुले क्षयरोग नियन्त्रण तथा अन्त्यका लागि आधुनिक प्रविधि गाउँ–गाउँसम्म पुर्याइएको बताउँदै समयमै परीक्षण गराउन अनुरोध गर्नुभयो।
पहिलो दिन वडा नं. १ स्थित पहाडीपुर आधारभूत स्वास्थ्य केन्द्रमा सञ्चालन गरिएको शिविरमा ४ सय ८७ जनाको एआई एक्स–रे परीक्षण गरिएको छ। परीक्षणका क्रममा क्षयरोगको आशंका गरिएका १ सय ३३ जनाको खकार नमुना संकलन गरिएको आयोजकले जनाएको छ। संकलित नमुनाको रिपोर्ट एक साताभित्र आउने बताइएको छ।
बारबर्दिया नगरपालिका स्वास्थ्य शाखाका अनुसार “हो ! हामी क्षयरोग अन्त्य गर्न सक्छौं, राष्ट्रिय अभियान हाम्रो योगदान” भन्ने नारासहित शिविर सञ्चालन गरिएको हो।
स्वास्थ्य शाखा प्रमुख गोविन्द पौडेलका अनुसार शिविर वैशाख २४ गते वडा नं. ४ स्थित पदनाहा स्वास्थ्य चौकी, वैशाख २५ गते वडा नं. ७ स्थित सिउनिया आधारभूत स्वास्थ्य केन्द्र र वैशाख २६ गते वडा नं. ११ स्थित लम्किफाँटा आधारभूत स्वास्थ्य केन्द्रमा सञ्चालन गरिनेछ।
शिविरमा एआई एक्स–रे प्रविधिबाट क्षयरोगका सम्भावित बिरामीहरूको प्रारम्भिक परीक्षण तथा सक्रिय खोजपड्ताल गरिनेछ। यस प्रविधिले रोगको छिटो, सहज र प्रभावकारी पहिचानमा सहयोग पुग्ने विश्वास गरिएको छ।
कार्यक्रममा बिएनएमटी नेपालले प्राविधिक सहयोग गरेको छ। स्वास्थ्य शाखाले सम्बन्धित वडाका नागरिकलाई तोकिएको मितिमा स्वास्थ्य संस्थामा उपस्थित भई सेवा लिन आग्रह गरेको छ।
स्वास्थ्य शाखा प्रमुख पौडेलले क्षयरोग समयमै पहिचान गरी उपचार गरे पूर्ण रूपमा निको हुने भएकाले लक्षण देखिएमा ढिलाइ नगरी परीक्षण गराउन सबैलाई आग्रह गर्नुभएको छ।
