काठमाडौं । नेपाल क्रिकेट संघ (क्यान) को नयाँ नेतृत्व चयन भएको छ । आज सम्पन्न निर्वाचनबाट अध्यक्षमा चतुरबहादुर चन्दसहित १७ सदस्यीय नयाँ नेतृत्व चयन भएको हो ।
अध्यक्षमा सर्वसहमतिमा चन्द दोहोरिंदा अन्य २ पदाधिकारी र तीन केन्द्रीय सदस्य निर्विरोध निर्वाचित भएका छन् भने एक सचिव र १० केन्द्रीय सदस्य चुनावबाट निर्वाचित भएका हुन् । उपाध्यक्षमा रोशनकुमार सिंह र कोषाध्यक्षमा पदमबहादुर खड्का निर्विरोध निर्वाचित भएका हुन् ।
यता सचिव पदमा भने राष्ट्रिय क्रिकेट टोलीका पूर्वकप्तान पारस खड्का विजयी भएका छन् । उनले प्रशान्तविक्रम मल्ललाई ११ मतले पराजित गरेका हुन् ।
केन्द्रीय सदस्यमा महिलातर्फ जयन्तीदेवी भट्टको मात्र उम्मेदवारी परेको थियो । उनी निर्विरोध भइन् । यसै गरी, लुम्बिनीबाट प्रदीप मजगैंया र कर्णालीबाट श्रीधर केसी पनि निर्विरोध केन्द्रीय सदस्य भए ।
कोशीबाट सुनिल कुमार पौडेललाई १३ मतले पराजित गर्दै अर्जुन पौडेल विजयी भए । यस्तै मधेस प्रदेशमा माधवकुमार कर्माचार्य र मोहम्मद दाउद अन्सारीको बराबरी ४२÷४२ मत आएकोमा गोलाप्रथाबाट कर्माचार्य विजयी भए ।
बागमतीबाट दिवाकर घले निर्वाचित भएका छन् । उनले ४६ भोट ल्याउँदा प्रतिस्पर्धी सुदीप पिया ३६ मात्र ल्याए ।
गण्डकीबाट सुदीप शर्मा ५२ मत ल्याउँदै विजयी हुँदा प्रतिस्पर्धी देवेन्द्र प्रजुले २८ मत मात्र ल्याए । सुदूरपश्चिममा विक्रम विष्ट २९ मतका साथ विजयी भएका छन् भने प्रतिस्पर्धी हरि रेग्मीले ३१ मत ल्याए ।
खुल्ला ५ केन्द्रीय सदस्यमा धीरेन्द्र साउद, दुर्गाराज पाठक, आयूष श्रेष्ठ, विरेन्द्रबहादुर चन्द विजयी भएका छन् । साउदले सर्वाधिक ५९ र पाठकले ५४ मत ल्याए । यस्तै आयूषको ५१ र चन्दको ३४ मत आएको छ ।
पाचौंमा करन महत्रा क्षेत्री र ऋषिराम गौतमको बराबर २६÷२६ मत आएकोमा गोला प्रथाबाट करनलाई विजयी घोषित गरिएको छ ।
