बाँसगढी
बाँसगढीमा प्रथम थारु कृषि, पर्यटन, संस्कृतिक मेला तथा बर्दिया माघ महोत्सव यहि पौष २७ गते देखि माघ ७ गते सम्म संचालन हुन थालेको छ । थारु कल्याणकारिणी सभा बाँसगढीको मुख्य आयोजनामा बरघर संस्था र गुरुवा बैदावा ढकेरहवा सोरहिन्या समाज बाँसगढीको सहकार्यमा माघ महोत्सव हुन थालेको हो ।
“थारु साँस्कृतिक संरक्षण र प्रवर्धनः कृषि पर्यटन, लघु उद्यम विकास र समुन्नतीमा हामी सबैको अभियान” भन्ने नाराका साथ बर्दिया थारु डान्स आईडल प्रतियोगिता, थारु साँस्कृतिक नृत्य प्रतियोगिता संचालन हुने आयोजकले पत्रकार सम्मेलन मार्फत जानकारी गराएको छ । मेलामा कृषि उत्पादनका बस्तुतहरुको प्रर्दशन, पर्यटकीय स्थलको प्रचारप्रसार तथा थारु सस्कृतिको प्रवर्धन गर्ने कार्यक्रम रहेको छ । साथै महोत्सवमा ख्याती प्राप्त राष्ट्रिय तथा स्थानीय कलाकारहरुको प्रस्तुती रहने छ । थारु समुदायको भाषा, कलासंस्कृति, गहना, थारु परम्परागत खानाहरुको समेत स्टल रहेकोका साथै रमाईलो मेलाहरु रहेको मेलाका प्रचारप्रसार समितिका संयोजक राज थारुले जानकारी गराउनु भएको छ ।
आयोजकले बाँसगढीमा प्रथम थारु साँस्कृतिक महोत्सव हुने थालेकोले सम्पुर्ण बर्दियाबासीहरुलाई एक पटक अवलोकनका लागि हार्दिक अनुरोध पत्रकार सम्मेलन मार्फत गरेको छ । मेलामा विद्यार्थी, जेष्ठ नागरिक तथा फरक क्षमता भएकाहरुलाई ३० प्रतिशत छुटको ब्यबस्था गरेको आयोजकले जनाएको छ ।
