मोरङ । इजरायलस्थित नेपाली दूतावासले समस्यामा परेका नेपालीहरुको उद्धार तथा स्वदेश फिर्तीका लागि अनलाइन रजिष्ट्रेशन सुरु गरेको छ । इजरायलको तेल अविवस्थित नेपाली दूतावासले आज साँझ फेसबुक पेजमार्फत सूचना जारी गर्दै उद्धार तथा स्वदेश फिर्ती बारे सूचना संकलन गर्ने उद्देश्यले अनलाइन दर्ता सुरु गरेको जनाएको छ ।
इजरायलमा विकसित पछिल्लो परिस्थितिकाबीच समस्यामा वा त्रासमा रहेका नेपाली नागरिकहरुको आवश्यकता अनुशार उद्धार, स्वदेश फिर्ती तथा अन्य प्रयोजनमा आधार प्राप्त होस् भन्ने हेतुले दूतावासले सूचना संकलनको काम सुरु गरेको फेसबुक पेजमा उल्लेख गरिएको छ ।
यसप्रकृयामा सहभागी हुन इच्छुक नेपाली नागरिकहरुलाई दूतावासको वेभसाइटमा राखिएको लिंकमा क्लिक गरि रजिष्ट्रेसन गर्नुहुन आह्वान पनि गरिएको छ । सूचनामा थप जानकारी आवश्यक भएमा दूतवासमा सम्पर्क गर्न पनि अनुरोध गरिएको छ ।
इजरायलस्थित नेपाली दूतावासले आज दिउँसो समेत यसै प्रकारको सूचना जारी गरेको भएपनि पछि पेजमा उपलब्ध भएको थिएन । यसबारे बुझ्दा दूतावासले पेजले नै सूचना हटाइ दिएको जनाएको छ ।
टेकपान डटकमले सोही सूचनालाई आधार मानेर समचार समेत बनाएको थियो । तर पछि दूतावासको पेजमा भने सूचना उपलब्ध भएको थिएन । यसबारे मोरङ खबरले समेत दूतावासलाई जानकारी माग गरेको थियो । चौतर्फि दवावपछि दूतावासले पुन अनलाइन रजिष्ट्रेशन सुरु गरेको भन्दै साँझ फेसबुक पेजमा जानकारी गराएको छ ।
अनलाइन रजिष्ट्रेशनका लागि नेपाली दुतावासको वेभसाइट https://il.nepalembassy.gov.np/ मा क्लिक गर्नुहोला । वेभसाइट खोल्नासाथ कभर पेजमै अनलाइन फर्मको अप्सन राखिएको छ ।
इजरायलमा प्यालेस्टाइन समर्थक हमासले आक्रमण गर्दा सयौंको ज्यान गएको छ । त्यसमा १० जना नेपाली विद्यार्थी पनि परेका छन् । अझै केही नेपाली युद्धग्रस्त क्षेत्रमा उद्धारको पर्खाइमा रहेको बताइएको छ । केहीलाई भने इजरायली सेनाले सुरक्षित स्थानमा सारेको छ ।
यता नेपाल सरकारले भोलि मंगलबारलाई राष्ट्रिय शोक दिवसको रुपमा घोषणा गरेको छ भने मृतक परिवारलाई १० लाख राहत दिने घोषणा गरेको छ । यस्तै नेपाल फर्कन चाहने इजरायलमा रहेका नेपालीहरुलाई विमान चार्टर गरि ल्याउने जनाएको छ ।
