होमेन्द्र थापा, बर्दिया
बर्दियाको गुलरिया नगरपालिका–३ तेजीपुरमा एक दिने निःशुल्क कान उपचार शिविर सञ्चालन हुने भएको छ। अल्टरनेटिभ युथ क्लबको मुख्य आयोजना, राष्ट्रिय स्वतन्त्र पार्टी वडा नं. ३ वडा समितिको सह–आयोजना तथा बी.एन. कम्युनिटी इयर केयरद्वारा सञ्चालित बी.एन. अस्पताल नेपालगञ्ज, बाँकेको प्राविधिक जनशक्ति सहयोगमा शिविर आयोजना गर्न लागिएको हो।
समुदायमा कान स्वास्थ्य सुरक्षासम्बन्धी सचेतना अभिवृद्धि गर्नुका साथै निःशुल्क कान उपचार, श्रवणशक्ति परीक्षण तथा स्वास्थ्यसम्बन्धी परामर्श उपलब्ध गराउने उद्देश्यले शिविर आयोजना गर्न लागिएको आयोजकले जनाएको छ।
आयोजकका अनुसार शिविर २०८३ भदौ ६ गते शनिबार बिहान १० बजेदेखि दिउँसो ३ बजेसम्म तेजीपुरमा सञ्चालन हुनेछ। शिविरमा निःशुल्क कान परीक्षण तथा उपचार, कान स्वास्थ्यसम्बन्धी परामर्श, श्रवणशक्ति परीक्षण र आवश्यक आधारभूत औषधि निःशुल्क वितरण गरिनेछ।
राष्ट्रिय स्वतन्त्र पार्टी वडा नं. ३ वडा समिति गुलरियाका सभापति यमबहादुर क्षेत्रीले शिविरबाट बालबालिका, युवा, ज्येष्ठ नागरिकलगायत समुदायका सबै सदस्यले सेवा लिन सक्ने जानकारी दिनुभयो।
शिविरबारे स्थानीयवासीलाई जानकारी गराउन आयोजकले वडाका विभिन्न गाउँमा पुगेर भेटघाट गर्ने, सामाजिक सञ्जालमार्फत प्रचारप्रसार गर्ने तथा प्रत्यक्ष रूपमा शिविरको जानकारी दिने काम गरिरहेको जनाएको छ। आयोजकले कानसम्बन्धी समस्या भएका तथा श्रवणशक्ति परीक्षण गर्न चाहने सबैलाई शिविरमा सहभागी भई सेवा लिन आग्रह गरेको छ।
