होमेन्द्र थापा, बर्दिया | असार ४ गते
बर्दियाको गुलरिया नगरपालिकाअन्तर्गत ६ हजार हेक्टर जमिन सिँचाइ गर्ने उद्देश्यले सुरु गरिएको बबई सिँचाइ आयोजनाले हालसम्म झन्डै ३५ प्रतिशत काम सम्पन्न गरिसकेको छ। बबई नदीको पानीलाई नहरमार्फत किसानका खेतमा पु-याउने उद्देश्यसहित यो आयोजना तीव्र गतिमा अघि बढिरहेको छ।
गुलरिया नगरपालिकामा निर्माण सुरु गरिएको नहरमध्ये ११ किलोमिटर शाखा नहर र ४ किलोमिटर मूल नहर निर्माणको कार्य ८३ करोड रुपैयाँको बजेटमा अघि बढाइएको हो। नहर निर्माणको जिम्मा स्वच्छन्द निर्माण सेवा, काठमाडौंले लिएको छ। निर्माण कार्य २०८३ सालको माघ महिनाभित्र सम्पन्न गर्ने लक्ष्य रहेको छ।
बबई सिँचाइ आयोजनाका इन्जिनियर विवेक पौडेलका अनुसार हाल आयोजनास्थलमा ७५ जना प्राविधिक तथा प्रशासनिक कर्मचारी, १३ वटा टिपर, ३ वटा स्काभेटर, ३ वटा जेसिबी, ४ वटा ट्र्याक्टर, ३ वटा पानी ट्यांकर, ३ वटा ट्रान्सपोर्ट मेशिन (टिएम) र आयोजनाको आफ्नै प्लान्ट सञ्चालनमा छन्। साथै, करिब २ सय जना मिस्त्री तथा श्रमिकहरु समेत खटिएका छन्।
हालसम्म बारबर्दिया, बाँसगढी, मधुवन नगरपालिका र बढैयाताल गाउँपालिकामा नहर निर्माण सम्पन्न भई केही क्षेत्रमा सिँचाइ कार्य सुरु भइसकेको छ। गुलरिया नगरपालिकामा भने माघ महिनामा सिलान्यास भएसँगै निर्माण कार्य सुरु गरिएको हो।
बबई सिँचाइ आयोजना पहिलोपटक २०४५/४६ सालमा सुरु भई २०४९/५० सालमा पहिलो चरणको काम सम्पन्न भएको थियो। राष्ट्रिय गौरवको आयोजना सूचीमा सूचीकृत भएपछि यस आयोजनाले नयाँ गति लिएको छ।
