होमेन्द्र थापा, बर्दिया
बर्दिया जिल्लामै पहिलो पटक चिनी उत्पादन सुरु भएको छ । राजापुर नगरपालिका–५ मा रहेको सुगर एण्ड केमिकल इन्डष्ट्रिज प्रा.लि.मा गत पुस २२ गतेदेखि औपचारिक रूपमा चिनी उत्पादन सुरु भएको हो ।
उद्योगका अनुसार दैनिक करिब ३ सय ५० मेट्रिक टन चिनी उत्पादन गर्ने क्षमता रहेको मिलमा हालसम्म करिब ४ हजार टन चिनी सञ्चित भइसकेको छ ।
कम्पनीका महाप्रबन्धक श्रीकृष्ण महत्वका अनुसार उत्पादन लागत प्रतिकिलो ८५ देखि ८८ रुपैयाँभन्दा बढी पर्ने भएकाले सोभन्दा सस्तोमा बिक्री गर्दा उद्योगलाई नाफा नहुने अवस्था रहेको छ । त्यसैले बजारमा चिनी बिक्री अझै सुरु गरिएको छैन ।
दैनिक करिब ३५ हजार क्विन्टल उखु आवश्यक पर्ने उद्योगले क्षमता अनुसार कच्चा पदार्थ नपाएको भन्दै किसानहरूलाई उखु खेती विस्तार गर्न आग्रह गरेको छ । हाल उद्योगसँग आबद्ध किसानहरूले करिब २ हजार ५ सय बिघा क्षेत्रफलमा उखु खेती गरिरहेका छन् भने भविष्यमा करिब ६ हजार बिघा क्षेत्रमा उखु खेती विस्तार गर्ने लक्ष्य राखिएको छ ।
बर्दियामा थप अर्को पनि सुगर उद्योग स्थापना गर्ने तयारी पनि भइरहेको छ । राजापुर सुगर एण्ड केमिकल इन्डष्ट्रिज प्रा.लि. करिब १८ बिघा क्षेत्रमा फैलिएको छ भने गुलरियामा पश्चिमाञ्चल सुगर इन्डष्ट्रिज प्रा.लि. १७ बिघा क्षेत्रमा निर्माणाधीन हुँदैछ । दुवै उद्योगले १० देखि १२ हजार बिघा क्षेत्रमा उखु खेती विस्तार गर्ने लक्ष्य राखेका छन् । हालसम्म करिब २ हजार ८ सय बिघा क्षेत्रमा उखु खेती भइसकेको उद्योगले जनाएको छ ।
