होमेन्द्र थापा, बर्दिया
बर्दिया जिल्लामा माघी पर्वको अवसर पारेर विभिन्न मेला, महोत्सव तथा माघी मिलन कार्यक्रमहरू आयोजना गरिएको छ । थारु समुदायको कला, संस्कृति र परम्पराको संरक्षण तथा प्रवद्र्धन गर्नुका साथै कृषि पर्यटनलाई प्रोत्साहन गर्ने उद्देश्यले यी कार्यक्रमहरू सञ्चालन गरिएको हो ।
जिल्लाको राजापुर नगरपालिकामा पुस २९ गतेदेखि माघी महोत्सव सञ्चालन भएको छ भने बाँसगढी र बारबर्दिया नगरपालिकामा पुस ३० गतेदेखि माघी मेला तथा महोत्सव जारी छन् । यसका अतिरिक्त अन्य पालिका तथा बस्तीहरूमा माघी मिलन कार्यक्रमहरू आयोजना गरिएको छ । मेला तथा महोत्सवहरूमा थारु भेषभूषा र परम्परागत थारु परिकारहरूको विशेष आकर्षण देखिन्छ ।
माघी पर्व सामान्यतया माघ १ गते मनाइने परम्परा रहे पनि थारु समुदायको बाक्लो बसोबास रहेका क्षेत्रमा पौष महिनाको अन्तिम हप्तादेखि नै माघीको रौनक सुरु भएको छ । स्थानीय स्तरमै आफ्नै मौलिक शैलीमा आयोजना गरिएका मेला तथा महोत्सवहरूमा नाचगान, झाँकी तथा विविध सांस्कृतिक कार्यक्रमहरू प्रस्तुत भइरहेका छन् ।
मेलामा थारु गाउँ, अटुवा, थारु संग्रहालय, परम्परागत भेषभूषा तथा थारु परिकारका स्टलहरू राखिएका छन्, जसले आन्तरिक तथा बाह्य पर्यटकलाई आकर्षित गरेको आयोजकहरूको भनाइ छ ।
महोत्सवले सांस्कृतिक पुनर्जागरण अभियान, बालविवाह रोकथाम, सामाजिक विकृति न्यूनीकरण तथा लागुऔषध दुव्र्यसन नियन्त्रण गर्ने उद्देश्य समेत बोकेको बाँसगढी उद्योग वाणिज्य संघका सचिव प्रेम नारायण पौडेलले जानकारी दिनुभयो । उहाँका अनुसार यस्ता कार्यक्रमहरूले समाजमा सकारात्मक सन्देश फैलाउनुका साथै युवा पुस्तामा आफ्नै संस्कृति प्रतिको गर्व बढाउने अपेक्षा गरिएको छ ।
