बर्दिया
बारबर्दिया नगरपालिका वडा नं. २ र मधुवन नगरपालिका वडा नं. ४ लाई जोड्ने कुमराघाटमा झोलुङ्गे पुल निर्माणको तयारी स्वरूप प्रारम्भिक सर्वेक्षण सम्पन्न गरिएको छ।
बारबर्दिया नगर प्रमुख छविलाल थारुको पहलमा सस्पेन्सन ब्रिज डिभिजन कार्यालय पुल्चोक, ललितपुरबाट आएको प्राविधिक टोलीको साथमा नगर प्रमुख, बारबर्दिया–२ का वडा अध्यक्ष रामफेरन थारु, वडा नं. ६ का झगबहादुर वली क्षेत्री, मधुवन नगरपालिकाका प्रवक्ता मेघबहादुर गुरुङ, वडा नं. ४ का अध्यक्ष बलिराम चौधरी, नगरसभा सदस्यहरू तथा स्थानीय बुद्धिजीवी, समाजसेवीहरूको उपस्थिति रहेको थियो।
सो अवसरमा उपस्थित टोलीले पुल निर्माणको सम्भाव्यता, भौगोलिक अवस्था र आवश्यक पूर्वाधारको प्रारम्भिक अध्ययन गरेको थियो। कुमराघाटमा झोलुङ्गे पुल निर्माण भएपछि दुई नगरपालिका बिचको आवतजावत सहज हुने र स्थानीयवासीको जीवनस्तरमा सकारात्मक प्रभाव पर्ने अपेक्षा गरिएको छ।
नगर प्रमुख छविलाल थारुले समन्वयका माध्यमबाट स्थानीय आवश्यकता पहिचान गरी पूर्वाधार निर्माणमा नगरपालिकाले प्राथमिकता दिएको बताउनु भएको छ।
